35 Joer Gemengesekretär vun der Stad Esch.

35 Joer Joer Gemengesekretär vun der Stad Esch, der zweetgréisste Gemeng aus dem Land, ass e laangen Dag, awer eng ganz interessant a léierräich Zäit, déi ech net mësse wëllt.

E facettenräichen Job, dee mäi Liewe beräichert huet an dee mir vill Freed bereet huet, wou ech wäertvoll Kontakter a respektvoll Frëndschafte konnt schléissen, déi ech haut nach wieder fleegen. Kuerz gesot, e fantastesche Beruff.

35 Joer Gemengesekretär heescht 4 Buergermeeschteren,  17 Schäffen a 65 Gemengeréit.

Oder anescht ausgedréckt:  festhale vun allen Décisioune vum Schäfferot a Gemengerot, alldeegleche Schrëftverkéier, Formatioun vu jonke Leit um INAP respektiv bei Stagen an der Gemeng, Matschaffen an der Examenskommissioun fir Gemengebeamten, eege Publikatiounen an Exposéen.

Ervirzesträichen ass virun allem Vereinfachung vun der Aarbecht vun de Memberen aus dem Gemengerot, der 1. Instanz an der Gemeng, duerch Aféiere vun engem Gemengerotsdossier, wou all Informatiounen dra sinn, bis hin zum e-Conseil. Net ze vergiessen, dass Esch als eenzeg Gemeng aus dem Land, des Décisioune vum Gemengerot direkt no der Sitzung um Internet publizéiert huet, a wou all Bierger direkten Abléck huet.

All dat ass nëmme méiglech wann een optimal encadréiert ass, wann Teamgeescht a respektvoll Zesummenaarbecht Hand an Hand ginn. Ech kann dofir meng Mataarbechter nëmme félicitéieren an hinne Merci soe fir hiren Engagement an hir Kompetenz.

Zu de markantsten Momenter vu menger Carrière ziele mat Sécherheet d’Organisatioun vu 6 Staatsvisite – Queen Elisabeth II, Juan Carlos, Kinnek  vu Spunien, Richard von Weizecker, Bundespresident vun Däitschland, de Poopst Jean-Paul II, de President vun der République populaire de Chine Li Xian Nian an de President vu Portugal Jorge Sampaio , wéi och d‘Organisatioun vun de Festlechkeeten zum Nationalfeierdag zesumme mat der Aktioun Freedefeier an den Empfank vu ville Botschafter an aner Notabilitéiten.

All dat Wëssen, all déi Erfahrung, déi ech mir an deene 35 Joer ugëeegent hunn, stellen ech elo bei menge sozialen an kulturellen Aktivitéiten an den Dingscht  vun alle Matbierger an eisem Land.

Domat fänkt en neit Kapitel a mengem Liewen un.

Jeannot Clement

Éieregemengesekretär vun der Stad Esch